جولولي

اشترك في خدمة الاشعارات لمتابعة آخر الاخبار المحلية و العالمية فور وقوعها.

مدير أعمال أحمد فهمي يكشف تفاصيل خناقته مع شيكابالا: "انت غلطت في ناس تخصني"

السبت 10 أكتوبر 2020 | 02:27 مساءً
ندى عصام
1047
احمد فهمي

خرج أحمد درويش مدير أعمال الفنان أحمد فهمي ليوضح ما جرى أمس بين فهمي ومحمود عبدالرازق الشهير بـ"شيكابالا" قائد ولاعب وسط نادي الزمالك، في حفل زفاف شريف منير حسن عضو مجلس إدارة نادي الزمالك السابق.

ونشر درويش فيديو عبر صفحته الشخصية بموقع التواصل الاجتماعي "فيسبوك" قال فيه:"هنتكلم فى الموضوع اللى واخد تريند على السوشيال بسبب اللى حصل بين الفنان أحمد فهمى ولاعب نادى الزمالك، الموضوع ليه خلفية قبل كده هنحكيها عشان الموضوع يبقى واضح لكل الناس، لأن فى أخبار غير صحيحة.. البداية كانت بعد ماتش السوبر فى الإمارات والإشارات البذيئة من لاعب نادى الزمالك، أحمد فهمى نزل بوست وقتها على السوشيال ميديا، وقال "أنت يا شيكابالا بتركب بونط على حساب نادي الزمالك وعامل نفسك زملكاوي وأنت كنت بتكلمني وقت فشل احترافك في البرتغال وكنت عايز ترجع على النادى الأهلى.. وتواصلت معايا وكلمتنى أكتر من مرة عشان أتواصل مع مسئولين النادى الأهلى".

وأضاف:"بالفعل أحمد فهمى تواصل مع مسئولي النادي الأهلى والمسئولين في النادى قابلوا الموضوع بالرفض وفهمى قال الموضوع ده.. وشيكابالا اعتبر إن ديه إهانة وإنه اتفضح أمام جمهور الزمالك.. بعدها أحمد فهمى كان أول واحد دافع عن شيكابالا ونزل بوست رفض التنمر والغلط فى الشكل والبشرة وجميع أشكال التنمر لا يجوز، وقال إنه خارج الرياضة وإن ليه علاقة بالإنسانية وقال أنا بدعم شيكابالا بكل وضوح".

وتحدث عن المشاداة التي حثت بين فهمي وشيكابالا قائلًا: "إمبارح كنا فى فرح أحد الأصدقاء وهو عضو مجلس إدارة سابق فى نادى الزمالك وجه مصطفى العماري وهو أحد الأصدقاء المشتركين بين فهمى وشيكابالا، وقاله تعالى يا فهمى وسلم فهمى راح بكل ود وقاله: "إزيك يا شيكا" ودا حصل قدام عينيا، شيكابالا قاله: "أنت بتقول على السوشيال ميديا إن أنا بركب بونط"، وفهمى قاله: "دا مش وقته ولا مجاله إننا نتكلم ودا فرح واحد صاحبنا"، فقاله "لاء.. أنت بتغلط فيا على السوشيال ميديا".

وتابع: فهمى قال لـ"شيكابالا": "أنت غلطت فى ناس تخصنى"، وتابع "شيكابالا شتم أحمد فهمى وجمهور الأهلى، وفى هذه اللحظة رد أحمد فهمى كمشجع وغلط فيه مباشرة بشخصه ولم يسئ لنادى الزمالك أو جمهور الزمالك، والخناقة بقت بين شخص بيغلط فى الأهلى وهو بيرد عليه لشخصه هو".

واختتم حديثه قائلًا:"تدخلنا وفصلنا بينهم واحنا بنرد بالفيديو ده على كل الناس اللى بتنزل الأخبار المغلوطة وأحمد فهمى كان محترم من أول الموقف لأخره، ولما رد كان رده كمشجع أهلاوى مش كفنان، ورد عشان الراجل ده غلط فى جمهور الأهلى.. والكلام ده شاهد عليه أعضاء مجلس إدارة نادى الزمالك، وجمهور نادى الزمالك، وابن رئيس نادى الزمالك كان بيحوش فهمى".