بسبب الفلوس.. تامر حسني يرد على تصريحات السقا: "كنت اتمنى تكلمني بيني وبينك"
خرج الفنان تامر حسني، للرد على تصريحات النجم أحمد السقا، عندما حل ضيفًا على أولى حلقات برنامج "السيرة"، تقديم الإعلامية وفاء الكيلاني وكشف عن خلافه لأول مرة معه بسبب فيلم "الفلوس"، الذي ظهر فيه كضيف شرف.
وكتب تامر عبر خاصية ال"ستوري" بموقع تبادل الصور والفيديوهات "انستجرام":"حبيبي وأخويا وصديق العمر ونجم الدنيا كلها أحمد السقا، كنت أتمنى انك تكلمني بيني وبينك، ولو كنت زعلان من أي حاجة أو فاهم أي حاجة غلط، لأن الحجات دي لا يمكن تفوتك، وأنا كنت أتمنى مكتبش الكلام دا هنا، بس عشان بعد كلامك في التلفزيون، الجمهور الكريم بقى ليه حق إنه يفهم الصح".
وأضاف: "عشان أفكرك بس، أنت كلمتني وقلت لي فيه خبر في موقع، وعليه صورة افتراضية للفيلم، وكاتبين أنك بطل في الفيلم، وأنا رديت عليك ان دي اجتهادات صحفية والصورة من تصميم محبين اللي اكيد فرحوا بالخبر اننا مع بعض، حتى أنا مقولتش ان دي الشركة المنتجة، لأنها شركة كبيرة، ولا يمكن تعمل كدا، لأن الفيلم متباع للخارج والداخل باسم أخوك تامر حسني، نزل والناس كلها شافته، وأنت مش فيه ولا فيه اسمك، كل الأبطال طالعين مرسومين، ومعرفش زعلك من إيه الحقيقة، كان ممكن تزعل لو الكلام دا نزل على صفحتي أو صفحة الشركة المنتجة".
تامر حسني
وتابع: "أنا شرحتلك دا من سنة واتكلمنا بعدها، مرة عيدت عليك في عيد ميلادك والتانية بخصوص برنامجك، ولو كنت لسه زعلان كنت هتقولي ساعتها، الفيلم بقاله سنة يا أحمد".
تامر حسني
واختتم حديثه قائلا: "أنت حبيبي يا أحمد وصديق عمر، عشان كدا أنا اللي مش هزعل منك، معلش طولت في الكلام، لأن برضوا زعلك يعز عليا".
وكان قد قال السقا في تصريحاته:"أنا في حد زعلان منه وحتى الآن مقولتلوش، أنا زعلان من تامر حسني.. أنا بحب تامر جدا ولو مش بحبه مش هزعل منه".
وأضاف:"زعلان منه عشان هو في فيلم "الفلوس" كلمني وقالي إنه عايزني أعمل معاه مشهد، وهو الحقيقة كان جاملني في مسلسل "ولد الغلابة"، وعادة بروح حفلات وأقدمه ده العلاقة اللي ما بينا، وبعد ما عملتله المشهد فوجئت إن الفيلم نزل إنه بطولة تامر وأحمد السقا وصورة معاه على الأفيش، كلمته قولتله إيه اللي بيحصل ده، يا تامر مرة قالي دول فانز، ومرة قال دول الشركة المنتجة، قولتله أنا معرفش حد منهم أنا معرفش غيرك، ودي أثرت عليا جدا نفسيا وعليا في شغلي".