جولولي

اشترك في خدمة الاشعارات لمتابعة آخر الاخبار المحلية و العالمية فور وقوعها.

أيمن بهجت قمر يرد على اتهامات أبو الليف: مقصرتش معاك.. من فضلك كفاية لحد كدة

السبت 12 ديسمبر 2020 | 03:25 مساءً
ندى عصام
1292
ايمن بهجت قمر

خرج الشاعر والمؤلف أيمن بهجت قمر، عن صمته للرد على المطرب نادر أبو الليف، بشأن تقصيره في حقه في العمل.

وكتب أيمن عبر صفحته الشخصية بموقع التواصل الاجتماعي "فيسبوك":" فيه موضوع متعلق من سبع سنين انا ما اتكلمتش فيه بس واضح ان الفنان نادر ابو الليف اللي بتجمعني بيه صلة قرابه مصمم انه يخليني اتكلم وانا هتكلم بالاصول واحتراما لصلة القرابه .. اكتر من مره نادر طلع بيلمح اننا قصرنا معاه او حاجات من هذا القبيل واخرهم على اليوم السابع الاسبوع ده وبما انه كلام يخص العمل مش عن العلاقات الشخصيه فاعتقد التوضيح ممكن يكون مهم عشان نقفل الصفحه دي وكلامي كله عليه شهود موجودين من زملاء ومن اقارب كمان من الدرجه الاولى".

ايمن بهجت قمر

وأضاف:" في ٢٠٠٩ لما اشتغلنا انا وتوما والملحن محمد يحيى وقدمنا اول البوم لابوالليف من انتاجنا احنا ما استخسرناش اي حاجه معاه وعملنا البوم كسر الدنيا وللي حضراتكم ماتعرفهوش اننا لما تعاقدنا مع ا. جمال مروان شركة ميلودي في وقت عزها وعز قنواتها اتفقنا انا ويحيى وتوما على ان المبلغ اللي هتدفعه ميلودي هنقسمه على اربعه ومافكرناش اننا أسماء ونادر صوت جديد وبعد ما نحسب مثلا التكلفه الفعليه الكبيره للالبوم واعتقد الكواليتي كان واضح يعني احنا كنا جدعان معاه واوي كمان وكنا كمنتجين بناخد نسبه احنا التلاته ١٠ في الميه لكل واحد يعني لو ابو الليف طلع فرح كان بيطلع لي ٣٠٠ جنيه".

وتابع:"المهم حصلت مشاكل وميلودي كانت بتقفل وحصل بينا وبينهم مشاكل وقضايا وكان ابو الليف هيتوقف لجأنا للمستشار مرتضى منصور اللي وقف جنبنا وقتها بلا مقابل بسبب تعاطفه معانا وبسبب تاني ان امير مرتضى كان عايز يخدمني ويستجدع معايا كعادته وبالفعل نجحنا اننا نتعاقد مع شركة نجوم ريكوردز ومضينا معاهم وتاني قسمنا مبلغ التعاقد على اربعه برغم اني كنت بطلع خسران كل البوم ومابكملش أجري كشاعر في الاغاني بس كان حماسي طاغي للتجربه".

أكمل حديثه:"بالرغم من أنه كان بيشتكي أن نوعية الأغاني اللي بكتبهاله مش بتأكله عيش زائد اننا متفقين معاه مافيش شارع الهرم من البداية جه قال أنا عايز أغني شعبي صرف وده ماكانش اتفاقنا اتفاجئنا اول ما سابنا انه راح عمل اغنيه اسمها كينج كونج 2 مع أخويا الشاعر هشام صادق وطبعا انا مازعلتش لإن ده هشام ومعاه مني تصريح يعمل اللي هو عايزه احنا اخوات بس استغربت بصراحه انت ليه يا نادر سبتنا عشان اغانينا مش بتنزلك لايف ورايح تعمل تاني نفس اللون! المهم لما مامشيتش الدنيا ابتدى يلمح بتقصيرنا معاه في اللقاءات وإلتزمنا الصمت .. سمعت كلام من عينة ان انا مانع ظهوره في القنوات واستغربت انه شايفني بالقوه والسطوه دي وكلام كتير بيوصلني بس مش ده المهم".

ايمن بهجت قمر

واختتم كلامه: من سنتين لقيت الفنان أحمد فهمي بيرشحه لتتر مسلسل الواد سيد الشحات رحبت جدا وعادي والأغنية نزلت .. فأنا حقيقي مش فاهم لحد دلوقتي هو بيقول ليه كده وعايز ايه واحنا قصرنا في ايه ربنا يوفقك يا نادر ويكتب لك الخير في حياتك ومن فضلك كفايه لحد كده .. واسف طولت جدا."