جولولي

اشترك في خدمة الاشعارات لمتابعة آخر الاخبار المحلية و العالمية فور وقوعها.

أيمن بهجت قمر لـ نادر أبو الليف: ما قصرتش معاك وكفاية لحد كده

الاحد 13 ديسمبر 2020 | 10:34 صباحاً
سارة إبراهيم
491
ايمن بهجت قمر

رد الشاعر والسيناريست أيمن بهجت قمر على تصريحات المطرب نادر أبو الليف، والتي ألمح خلالها عن تقصير أيمن في حقه في العمل.

أيمن بهجت قمر كتب، على حسابه على موقع "الفيس بوك": "فيه موضوع متعلق من سبع سنين انا ما اتكلمتش فيه بس واضح ان الفنان نادر ابو الليف اللي بتجمعني بيه صلة قرابه مصمم انه يخليني اتكلم وانا هتكلم بالاصول واحتراما لصلة القرابه .. اكتر من مره نادر طلع بيلمح اننا قصرنا معاه او حاجات من هذا القبيل واخرهم على اليوم السابع الاسبوع ده وبما انه كلام يخص العمل مش عن العلاقات الشخصيه فاعتقد التوضيح ممكن يكون مهم عشان نقفل الصفحه دي وكلامي كله عليه شهود موجودين من زملاء ومن اقارب كمان من الدرجه الاولى".

وتابع: "في ٢٠٠٩ لما اشتغلنا انا وتوما والملحن محمد يحيى وقدمنا اول البوم لابوالليف من انتاجنا احنا ما استخسرناش اي حاجه معاه وعملنا البوم كسر الدنيا وللي حضراتكم ماتعرفهوش اننا لما تعاقدنا مع ا. جمال مروان شركة ميلودي في وقت عزها وعز قنواتها اتفقنا انا ويحيى وتوما على ان المبلغ اللي هتدفعه ميلودي هنقسمه على اربعه ومافكرناش اننا أسماء ونادر صوت جديد وبعد ما نحسب مثلا التكلفه الفعليه الكبيره للالبوم واعتقد الكواليتي كان واضح يعني احنا كنا جدعان معاه واوي كمان وكنا كمنتجين بناخد نسبه احنا التلاته ١٠ في الميه لكل واحد يعني لو ابو الليف طلع فرح كان بيطلع لي ٣٠٠ جنيه المهم".

وأضاف: "حصلت مشاكل وميلودي كانت بتقفل وحصل بينا وبينهم مشاكل وقضايا وكان ابو الليف هيتوقف لجأنا للمستشار مرتضى منصور اللي وقف جنبنا وقتها بلا مقابل بسبب تعاطفه معانا وبسبب تاني ان امير مرتضى كان عايز يخدمني ويستجدع معايا كعادته وبالفعل نجحنا اننا نتعاقد مع شركة نجوم ريكوردز ومضينا معاهم وتاني قسمنا مبلغ التعاقد على اربعه برغم اني كنت بطلع خسران كل البوم ومابكملش أجري كشاعر في الاغاني بس كان حماسي طاغي للتجربه".

نادر ابو الليف

وأكمل: "نزل الالبوم وقت نجاح الاخوان وماعملش جو وابتدت البلد تدخل في ظروف صعبه وفي وقت الاعلان الدستوري لمرسي والبلد في مظاهرات وواقفه ابتدى نادر يضغط.. هو انا ليه مش بنزل حفلات ؟ فين الكليبات؟ فين الافراح ؟ مع ان الشعب كان قاعد عند الاتحاديه والتحرير وقتها ".

وتابع: "هو نجح في وقت صعب .. فضل يضغط وراح باعت رساله لكريم الحميدي اللي كان مسؤول وقتها في نجوم ريكوردز وكريم موجود وكانت رساله مش لطيفه وطلب وقتها فسخ التعاقد معانا ومع نجوم ريكوردز وانا وقتها اتصدمت ..إفسخ مع نجوم ريكوردز.. مع توما.. مع يحيى ..بس مش معايا انا !! المهم عاملناه بمنتهى الاحترام والرقي انا ويحيى وتوما وفسخنا بالحسنى وكالعاده نجوم ريكوردز محترمين ا. ايمن سالم ومدام هاله حجازي واتنازلوا عن الشرط الجزائي وخسرنا تعاقد محترم جدا عمرنا ما هنعرف نعوض ربعه النهارده ..كان فيه حسابات بينا قولنا في بيتها وحبيبنا واخونا وادينا له كامل حريته ".

واستطرد: "وبرغم انه كان بيشتكي ايام الاعلان الدستوري ان نوعية الاغاني اللي بكتبهاله مش بتأكله عيش زائد اننا متفقين معاه مافيش شارع الهرم من البدايه جه قال انا عايز اغني شعبي صرف وده ماكانش اتفاقنا اتفاجئنا اول ما سابنا انه راح عمل اغنيه اسمها كينج كونج ٢ مع اخويا الشاعر هشام صادق وطبعا انا مازعلتش لإن ده هشام ومعاه مني تصريح يعمل اللي هو عايزه احنا اخوات بس استغربت بصراحه انت ليه يا نادر سبتنا عشان اغانينا مش بتنزلك لايف ايام الاعلان الدستوري ورايح تعمل تاني نفس اللون ! ".

واختتم كلامه، بقوله: "المهم لما مامشيتش الدنيا ابتدى يلمح بتقصيرنا معاه في اللقاءات وإلتزمنا الصمت .. سمعت كلام من عينة ان انا مانع ظهوره في القنوات واستغربت انه شايفني بالقوه والسطوه دي وكلام كتير بيوصلني بس مش ده المهم.. من سنتين لقيت الفنان احمد فهمي بيرشحه لتتر مسلسل الواد سيد الشحات رحبت جدا وعادي والاغنيه نزلت .. فأنا حقيقي مش فاهم لحد دلوقتي هو بيقول ليه كده وعايز ايه واحنا قصرنا في ايه.. ربنا يوفقك يا نادر ويكتب لك الخير في حياتك ومن فضلك كفايه لحد كده .. واسف طولت جدا ".

ايمن بهجت قمر ونادر ابو الليف